“Mən həqiqətən bir canavar yaratdım” – FİFA-nın keçmiş prezidenti

FİFA-nın sabiq prezidenti Yozef Blatter müasir futboldan danışıb.

Komanda.az xarici KİV-ə istinadən xəbər verir ki, FİFA-nın keçmiş rəhbəri indi yaxşı futbol satışlarının şahidi olduqlarını bildirib:

“Sələfim FİFA-nın ilk real pulunu qazandığı Cənubi Afrikadakı dünya çempionatından sonra mənə bir canavar yaratdığımı söylədi.

Və o haqlı idi. Mən həqiqətən bir canavar yaratdım. 1975-ci ildə inkişaf proqramlarının direktoru kimi ona qoşulanda FİFA kasıb idi. “Adidas” (Amerika şirkəti) kimi sponsorlar pul ödəmirdilər, sadəcə olaraq top və köynək verirdilər. Əslində, pul qazanan ilk sponsorluq müqaviləsi 1976-cı ildə “Coca-Cola” ilə olub.

Sonra birdən-birə reklama icazə verən ictimai televiziya gəldi. Futbol televiziya üçün super məhsula, çox pula satıla bilən super şouya çevrildi. Real pul gətirən ilk dünya kuboku 2010-cu ildə Cənubi Afrikada keçirilən dünya çempionatı olub.

Canni İnfantino 2016-cı ildə prezident olanda özünü pul maşınının işlədiyi yerdə tapdı. İndi o, bunu getdikcə daha da sürətləndirir.

Biz futbol satışlarının şahidi oluruq. Avropanın UEFA-sını götürək. Bir vaxtlar Çempionlar Kuboku, Kuboklar Kuboku və Yarmarka Kuboku olub. İndi 36 komandalı Çempionlar Liqası, 36 komandalı Avropa Liqası, 36 komandalı Konfrans Liqası var. Və sonra Millətlər Liqası.

Növbəti dünya çempionatında, 2026-cı ildə isə artıq 48 iştirakçı olacaq ki, bu da FİFA-ya üzv olan bütün ölkələrin demək olar ki, dörddə biri deməkdir. Klublararası dünya çempionatı 2025-ci ildə 32 komandanın iştirakı ilə keçiriləcək.

Pul çox olduğuna görə hamı alqışlayır. Amma bu həddən artıq doyma futbola marağın itməsinə gətirib çıxarır, mən bunu özümdə görürəm”.