Birgül Soltanovadan AÇ-də bürünc medal

İtaliyanın Faenza şəhərində yeniyetmə güləşçilərin Avropa çempionatı davam edir.

Komanda.az xəbər verir ki, üçüncü yarış günündə 43, 49, 57, 65 və 73 kq-da çıxış edən qızlar mübarizəyə qoşulub.

Yarışa 1/4 finaldan başlayan Zenfira Həşimova Belarus güləşçisinə rahat qalib gələrək yarımfinala yüksəlib. Bu mərhələnin görüşləri axşam seansında keçirilib. Ukraynalı rəqibinə müqavimət göstərə bilməyən Həşimova iyunun 20-də bürünc medal uğrunda güləşib və Rusiya təmsilçisinə uduzaraq 5-ci yerlə kifayətlənib.

Gültəkin Şirinova qitə birinciliyinə inamlı start verib. Həmyerlimiz ilk mərhələdə bolqar rəqibinə birinci hissədə “tuşe” ilə qalib gəlib. Ancaq 1/4 finalda Belarus idmançısıyla bacarmayıb.

Birgül Soltanova ukraynalı həmkarına qalib gəlməyə yaxın olub. Ancaq sona 10 saniyə qalmış hesabdakı üstünlüyü əldən verərək uduzub. Rəqib finala yüksəldiyi üçün Soltanova iyunun 20-də təsəlliverici görüşə vəsiqə qazanıb. Ancaq Moldovadan olan rəqibi xalçaya çıxmadığı üçün Birgül 3-cü yer uğrunda güləşməyə haqq qazanıb. Həlledici qarşılaşmada Estoniya güləşçisinə şans tanımayan Soltanova bürünc medalı boynundan asıb.

Nigar Mirzəzadə də yarışa iddialı başlayıb. Yığma üzvü ilk görüşdə ispan güləşçini “tuşe” ilə məyus edib. Ancaq daha sonra ukraynalı rəqibinə məğlub olub.

43 kq
1/4 final – Zenfira Həşimova – Valentina Haroşka (BLR) 8:0
1/2 final – Zenfira Həşimova – Aida Kərimova (UKR) 0:11
Bürünc medal görüşü – Zenfira Həşimova – Olqa Rexmetullova (RUS) 4:15

49 kq
Təsnifat – Gültəkin Şirinova – Fatme Tahir Şaban (BUL) 8:0 (tuşe)
1/4 final – Gültəkin Şirinova – Anastasiya Yanotava (BLR) 2:14

57 kq
1/8 final – Birgül Soltanova – Kristina Sokolovska (UKR) 4:6
Təsəlliverici görüş – Birgül Soltanova – Emiliya Krekiun (MDA)+:-
Bürünc medal görüşü – Birgül Soltanova – Marya Plaser (EST) 8:2

65 kq
1/8 final – Nigar Mirzəzadə – Andrea Molina Rodriges (ESP) 2:4 (tuşe)
1/4 final – Nigar Mirzəzadə – Yevgeniya Siedix (UKR) 0:4 (tuşe)