“Qarabağ”dan ayrılan Gerye “Neftçi”yə keçir – Aylıq məvacibi bilindi

Bir müddət əvvəl “Qarabağ”la yollarını ayıran Donald Gerye yenidən Azərbaycana qayıda bilər.

Komanda.az xəbər verir ki, haitili futbolçu “Neftçi” klubuna keçməyə yaxındır. Bu barədə “vantbefinfo.com” saytı məlumat yayıb. Xəbərdə, Geryenin Bakı təmsilçisi ilə 2 illik müqavilə imzalayacağı və sentyabrın 1-nə qədər komandanın düşərgəsinə qoşulacağı bildirilib. Gerye yeni müqavilə ilə aylıq 35 min dollardan çox məvacib qazanacaq.

2017-ci ildən “Qarabağ”da çıxış edən Geryenin klubla müqaviləsinin müddəti ötən mövsümün sonunda başa çatmışdı. Klub rəhbərliyi müdafiəçiyə yeni sözləşmə təklif etsə, o, daha artıq pul istədiyindən, tərəflər razılığa gələ bilməmişdi.