“Belə heyətlə avrokuboklara vəsiqə üçün oynamamaq düzgün olmaz”

“Sabah”ın baş məşqçisi Ramin Quliyev “Zirə”yə qarşı keçirdikləri yoxlama oyunundan sonra fikirlərini bildirib.

Komanda.az xəbər verir ki, o, 0:0 hesabıyla bitən matçdan sonra jurnalistlərin suallarını cavablandırıb:

• Oyunla bağlı fikirləriniz?
• İlk matçımız idi. İki fərqli hissə oldu. Əsas görmək istədiyimiz futbolçuların geridə qalan 7-8 günlük hazırlıq fonunda fiziki durumları idi. Xoş olan o idi ki, hər iki hissədə fiziki baxımdan istədiyimizi ala bildik. Şükürlər olsun ki, heç bir zədə olmadı.
• İlk hissədə komandanız sərt oynayırdı. Bunu siz tapşırmışdız?
• Yox, sərtlik deməzdim. Sadəcə, ikili mübarizəni qazanmaq, futbolçunun özünü göstərmək istəyi belə sərtliyə gətirib çıxarırdı. İstəməzdik ki, yoxlama oyununda belə sərtlik görünsün. Ancaq yenə də deyirəm, sərtlik deyildi. Sadəcə, futbolçuların top qazanmaq istəyi, mübarizəsi belə sərt görünürdü.
• İşləriniz plan üzrə gedirmi?
• Bəli. Gecikən futbolçuların da olduğunu deməzdim. Çünki mövsümün əvvəlinə hələ vaxt var. Bəzi futbolçular yeni məşqlərə başlayıb və onları indidən yükləmək istəmirik. Növbəti matçımız “Keşlə”yə qarşı olacaq. Onda artıq fərqli komanda olacaq.
• Yeni gələnlərdən sonra fəlsəfənizdə dəyişiklik olacaqmı? Yəni, sisteminizə uyğun futbolçular gələcək, ya futbolçulara uyğun sistem quracaqsız? Ağlınızda bir sistem varmı?
• Belə deyim, əvvəl əlimizdə olan futbolçulara uyğun bir heyət qururduq. İndi isə planlarımıza uyğun futbolçular gətiririk. Sistemimizi daha təkmilləşdirəcəyik. Belə başa düşülməsin ki, yalnız bir sistemimiz olacaq. Sadəcə, rəqiblərə uyğun fərqli sistemlərdə çıxış edə bilərik. Elə futbolçular gətiririk ki, istədiyimiz vaxtda sistemi dəyişə bilək. Bizim çempionatdakı komandalara fərqli yanaşmalarımız var. Rəqibə görə hər an sistemimiz dəyişə bilər.
• Yeni mövsümdə hədəf nədir?
• Hədəfimiz avrokuboklara vəsiqə qazanmaqdır. Bu, qarşımıza qoyulmuş hədəfdir. Belə gedişatla, gətirəcəyimiz oyunçularla inanıram ki, hədəfimizə çatacağıq. Belə heyətlə, gələcək futbolçularla avrokuboklar üçün oynamamaq düzgün olmazdı.
• Yeni transferlər olacaqmı?
• Heyətimizə 4-5 futbolçu qoşulacaq. Gedişata görə ola bilər ki, bu say artsın. Vəziyyətə görə gələnlər də ola bilər, gedənlər də. Yetərincə heyətimiz var və gələnlərdən sonra artıq komanda daha güclənəcək.

Şahin Cəfərov