Ançelotti: “Bellingem veteran futbolçu kimi görünür”

“Real”ın baş məşqçisi Karlo Ançelotti komandanın yarımmüdafiəçisi Çud Bellingemin La Liqanın 11-ci turunun “Barselona” ilə oyununda çıxışı ilə bağlı təəssüratlarını bölüşüb.

Komanda.az “Marca”-ya istinadən xəbər verir ki, o, ingilis futbolçunun performansını yüksək dəyərləndirib:

“Bellingem çox səmərəli idi. İlk qol əla idi, ikinci qolla isə o, fürsətdən istifadə etməyə hazır idi. Bellingemin performansından təəccüblənirik. Xüsusilə, onun effektivliyindən. Çoxlu qollar vurur. İndi məni təəccübləndirən uzaq məsafədən zərbəsi idi. O, cərimə meydançasından kənardan çox qol vurmayıb. Bellingem veteran futbolçu kimi görünür. O, çox yaxşı əhval-ruhiyyədədir”.

20 yaşlı futbolçu bu mövsüm bütün turnirlərdə 13 matçda iştirak edib, 13 qol vurub və 3 məhsuldar ötürmə edib.

İspaniya çempionatının “Barselona” ilə son oyununda Bellingem dubl edib. Bunun sayəsində “Real” 2:1 hesabı ilə qalib gəlib.