Bazarda üzlərinə də baxılmayan “azad ulduzlar” – FOTO
Futbol klubları yay bazarlığı edirlər. Hər gün yeni transfer xəbərləri gəlir. Amma bazarda ulduz statusunda olan xeyli futbolçu var ki, onlar hələ də özlərinə komanda tapa bilməyiblər. Özü də bu ulduzlar azad agentdirlər. Yəni müqavilə bağlayacaqları komandalara havayı başa gələcəklər. Ancaq buna baxmayaraq, hələ ki, onların üzünə baxan da yoxdur.
Komanda.az belə futbolçulardan bir neçəsi haqda məlumat verir:
Başlayaq Loris Kariusdan. Yəqin ki, bu qapıçını lap yaddan çıxarıbsız. O, bu illər ərzində “Liverpul”un iştirak ərizəsində olub. Baxmayaraq ki, bu komandanın heyətində sonuncu dəfə 2018-ci ildə meydana çıxıb. 29 yaşlı qapıçı hazırda daha çox idman zalında məşq edir. Deyəsən, yeni klubla bağlı söz-söhbət də yoxdur.
“Real”dan ayrılan 34 yaşlı Marseloya isə maraq var. Ancaq braziliyalı hələ ki, seçim etməyə tələsmir. Niyə? Ona Türkiyə, Qətər, Birləşmiş Ərəb Əmirliklərindən təklif var. Amma Marselo karyerasını Avropada davam etdirmək niyyətindədir.
Qışda söz-söhbət gəzirdi ki, 27 yaşlı Ceyson Denayerlə “Barselona” və “Yuventus” maraqlanır. Ancaq elə ki, futbolçu azad agent oldu, bu söz-söhbətlər də qeybə çəkildi. İndi də yazırlar ki, belçikalı karyerasını Moskva “Spartak”ında davam etdirə bilər.
Daha bir ulduz, Sesk Fabreqas da azad agentdir. Düzdür, deyilənlərə görə, Sesk “Koma” ilə ilkin müqavilə bağlayıb. Amma bütün hallarda, rəsmi müqavilənin bağlanması avqustun əvvəlinə təsadüf edəcək. Yəni Fabreqas de-fakto azad agentdir.
Xuan Mata da eyni durumdadır. Amma onunla da bir neçə klub maraqlanır. İspaniyadan “Betis” və “Sevilya”, İngiltərədən “Lids”.
İyulun ortasında xəbər yayıldı ki, İsko artıq “Sevilya”dadır. Üstündən iki həftə keçib, hələ də səs-soraq yoxdur.
Bir sözlə, bazarda o qədər “azad ulduz” var ki, onlardan yaxşı bir komanda düzəldib, Çempionlar Liqasında da oynamaq olar. Məsələn, belə bir komanda:
Qapıçı: Serxio Romero
Müdafiəçilər: Serj Orye, Ceyson Denayer, Elyakim Manqala, Marselo
Yarımmüdafiəçilər: İsko, Fabian Delf, Sesk Fabreqas, Xuan Mata
Hücumçular: Luis Suares, Edinson Kavani
Bizi Telegramda izləyin
Bizi Facebook-da izləyin
