“Bayern” rəsmisindən adı “Əl-Nəsr”lə hallanan futbolçu haqda açıqlama

“Bayern” fransalı vingeri Kinqsli Komanın yaxın günlərdə Səudiyyə Ərəbistanına köçəcəyi barədə yayılan məlumatları təsdiqləməyib.

Son günlər mətbuatda 29 yaşlı futbolçunun “Əl-Nəsr”ə keçməyə razılıq verdiyi bildirilirdi.

Münhen təmsilçisi dünən İsveçrənin “Qrasshopper” klubuna qarşı yoxlama oyunu keçirib. Ancaq Koman matçın iştirak ərizəsinə salınmayıb.

Komanda.az xarici KİV-ə istinadən xəbər verir ki, klubun idman direktoru Kristof Froind Komanın xəstə olduğunu bildirib:

“Koman xəstələnib. Sağlam olsaydı, heyətdə yer alacaqdı”.

Jurnalistlər ona Komanın bu həftə “Əl-Nəsr”ə mümkün keçidi ilə bağlı sual versələr də, o, bunu təsdiq etməyib:

“Şayiələr və ehtimallar həmişə olur, amma bizdə xəbər yoxdur. O, hələ də ‘Bayern’in futbolçusudur, yoxluğunun səbəbi yalnız xəstəlikdir”.

“Bayern” şənbə günü Almaniya superkubokunun finalında “Ştutqart”la qarşılaşacaq.