“Barselona”da Ter Ştegen haqda qərar verilib

“Barselona” qapıçısı Mark-Andre ter Ştegenlə yollarını ayırmağa hazırdır.

Komanda.az AS-a istinadən xəbər verir ki, Kataloniya klubunun prezidenti Xuan Laporta “Espanyol”un qolkiperi Xuan Qarsiyanın “Barselona”nın təklifini qəbul edəcəyinə ümid edir.

Laporta idarə heyətinin üzvlərinə bildirib ki, bu baş verərsə, klub müqaviləsinin müddəti 2028-ci ilə qədər qüvvədə olan Mark-Andre ter Ştegeni satmaq niyyətindədir.

Bu, Laportanın ilk dəfədir ki, bu barədə açıq şəkildə danışması kimi qeydə alınıb. Klub artıq Ter Ştegeni əvəzolunmaz fiqur kimi görmür.

“Barselona” qapı xəttini gücləndirmək niyyətindədir və Xuan Qarsiyanı dərhal əsas heyətdə görmək istəyir. Onu icarəyə göndərmək planlaşdırılmır. İkinci qapıçı rolu üçün isə hazırda müqaviləsinin müddətinin uzadılması təklifi alan polşalı Voyçex Şesnı nəzərdə tutulur.