“Barselona”da narahatlıq – Futbolçular şübhə içindədir

“Barselona”nın futbolçularında cari mövsümün sonunda baş məşqçi Xavi gedəndən sonra Kataloniya klubunun idman layihəsinin necə olacağı ilə bağlı şübhələr var.

Komanda.az “sport.es”-ə istinadən xəbər verir ki, “Barselona”nın futbolçuları komandanın nəticələrinin rəhbərliyin gözləntilərinə uyğun gəlməməsinə baxmayaraq, Xavinin tamamilə kluba sadiq olduğunu görürlər. Oyunçular Xavini əvəz edəcək mütəxəssisin komandaya eyni səviyyədə “can yandıracağına” şübhə edirlər. Üstəlik, Xavini kimin əvəzləyəcəyinin dəqiq anlaşılmaması şübhələri daha da artırır.

Komandada məhz Xavinin təşəbbüsü ilə dəvət olunmuş müdafiəçilər Jül Kunde və Joao Kanselo kimi futbolçuların olduğu vurğulanır. İndi onlar “Barsa”dakı gələcəklərindən narahatdırlar.

Futbolçular həm də ona görə təzyiq altındadır ki, “Barselona” klubun maliyyə vəziyyətini yaxşılaşdırmaq üçün bəzi oyunçuları satmalıdır.