Bakıda daha bir meydança istifadəyə verildi

Bu gün Bakı şəhərində Azərbaycan Futbol Federasiyaları Assosiasiyası, Yasamal rayon İcra Hakimiyyəti və Yasamal bələdiyyəsi tərəfindən birgə inşa olunmuş daha bir yeni süni örtüklü meydança sakinlərin istifadəsinə verilib.

Komanda.az xəbər verir ki, 17 saylı Yasamal üçüncü seçki dairəsindən Milli Məclisin deputatı Elnur Allahverdiyevin təşəbbüsü ilə tikilən meydança Bakıxanov pr. 2 ünvanında yerləşir. Meydança Yasamal Rayon İcra Hakimiyyəti və Yasamal Bələdiyyəsinin dəstəyi ilə ərsəyə gəlib. Uzunluğu 32,5, eni 16,5 metrdir. Meydançanın süni ot örtüyünü AFFA təqdim edib.

Bu, deputat Elnur Allahverdiyevin təşəbbüsü ilə son 7 ayda tikilən sayca üçüncü məhəllə meydançasıdır. Əsas məqsəd gənclərin və uşaqların sağlam həyat tərzinə həvəsləndirilməsidir. Meydança tikildikdən sonra sakinlərin ixtiyarına verilir.

Meydançanın açılışında Yasamal RİH-nin başçısı Elşad Həsənov, millət vəkili Elnur Allahverdiyev, AFFA-nın icraçı vitse-prezidenti Elxan Məmmədov, futbol və rayon ictimaiyyətinin tanınmış üzvləri iştirak ediblər.

Allahverdiyev bildirib ki, “Bu, seçildiyim dairə ərazisində Yasamal RİH, Yasamal Bələdiyyəsi və AFFA ilə müştərək tikilib istifadəyə verilmiş sayca üçüncü stadiondur. Hər üçünün inşası seçicilərimizin xahişi ilə reallaşıb. Yasamal RİH ilə birgə qarşıdakı müddətdə də rayon gənclərinin sağlam həyat tərzinə həvəsləndirilməsi üçün müxtəlif idman qurğuları inşa ediləcək, tədbirlər keçiriləcək”.