Azərbaycan Premyer Liqası: 21-ci əsrdə üçüncü məhsuldarlıq qeydə alınıb

Azərbaycan Premyer Liqasının 2024/2025 mövsümü məhsuldar keçən 1-ci turla başlayıb.

Komanda.az Peşəkar Futbol Liqasının mətbuat xidmətinə istinadən xəbər verir ki, Bu, start üçün 21-ci əsrin üçüncü göstəricisidir.

İlk turun 5 oyununda 16 qol vurulub. “Araz-Naxçıvan” – “Qarabağ” (1:4) və “Zirə” – “Səbail” (4:1) görüşlərinin hərəsində 5, “Sabah” – “Şamaxı” (2:2) matçında 4, “Sumqayıt” – “Kəpəz” (2:0) qarşılaşmasında 2 top qeydə alınıb. Yalnız “Neftçi” – “Turan Tovuz” görüşündə qol vurulmayıb.

Mövsümün ilk turunun orta məhsuldarlığı 3,20 olub. Yalnız iki dəfə 1-ci tur daha məhsuldar olub. 2001/2002 mövsümündə bu rəqəm 4,00-a, 2017/2018 mövsümündə 3,25-ə bərabər olub. 23 il əvvəl 5 oyunda 20 top vurulubsa, 7 il öncə 4 qarşılaşmada 13 qol qeydə alınıb.

Azərbaycan Premyer Liqasında 2024/2025 mövsümünə avqustun 2-də start verilib.