Azərbaycan millisinin üzvü: “Açıq-aşkar düşmənçilik gördüm”

“Səhvlər etdim və yəqin ki, bunlar kifayət qədər çox idi. Amma açıq-aşkar düşmənçilik gördüm”.

Komanda.az “transfermarkt.ch”-ə istinadən xəbər verir ki, bunu Azərbaycan millisinin futbolçusu Renat Dadaşov Almaniyanın “Ayntraxt” (Frankfurt) klubundan uzaqlaşdırılması ilə bağlı danışarkən deyib.

23 yaşlı hücumçu bu hadisələrdən sonra vaxta ehtiyacı olduğunu bildirib:

“Hər gün nə qədər böyük fürsəti əldə verdiyimi anladım. Durmadan beynimə səslər gəlirdi. Mənə həmişə inanan insanları məyus etmişdim. Azarkeşlərin tənqidini başa düşürəm. Amma bunun üçün səbəblər olmalıdır. Hər peşəkar futbolçu ilk növbədə insandır və təhqir ona zərbə vurur. Mənim üçün qovulmaq həyəcan siqnalı idi. Daha yaxşı idmançı və insan olmaq üçün oyanış oldu. Bu, həm də yeni başlanğıcın müjdəsi idi. Vaxta ehtiyacım olduğunu anladım. Hər şeyi dəyişməli olduğumu başa düşdüm, əks halda karyeram çox uzun çəkməyəcəkdi”.

Hazırda İsveçrənin “Qrasshoppers” klubunda çıxış edən hücumçu 2018-ci ildə Portuqaliya təmsilçisi “Eştoril”ə keçidini xatırlayıb:

“Sadəcə, Almaniyadan çıxmaq istəyirdim. Bunların keçmişdə qalmasına icazə vermək niyyətində idim. Beynimi təmizləməli, təzyiqdən, daimi gözləntilərdən uzaqlaşmalıydım. Hər şeydən əvvəl yeni başlanğıc hədəfləyirdim. Təbii ki, Portuqaliyada da ruhdan düşdüyüm günlər olub, amma həmişə özümə deyirəm: Məqsədim üçün mübarizəni davam etdirəcəm”.

Renat Dadaşov 2013-2017-ci illərdə “Ayntraxt”ın aşağı yaş qruplarından ibarət komandasında oynayıb. O, 2017/2018 mövsümündə əsas komandaya cəlb olunsa da, 2018-ci ilin yanvarında intizamsızlığa görə klubdan kənarlaşdırılıb.