Bəhlul Mustafazadə “Əl Əyn”ə keçdi – Transferin detalları Komanda.az-da

Azərbaycan millisinin futbolçusu Bəhlul Mustafazadə “Sabah” klubundan ayrılıb.

Bu barədə Komanda.az-a klubun mətbuat xidmətinin rəhbəri Elnur Həmidov məlumat verib. Həmidov, Bəhlulun transferi ilə bağlı Birləşmiş Ərəb Əmirliklərinin “Əl Əyn” klubu ilə razılaşdıqlarını bildirib. O, bu keçidin qarşılığında “Sabah”a müəyyən məbləğin ödəniləcəyini deyib:

“Bəhlul “Əl Əyn”ə transfer olunub. Bu keçidin qarşılığında kluba müəyyən məbləğ ödəniləcək.

Bəhlula bir neçə klubdan təklif var idi. Ən ciddi təklif isə “Əl Əyn”dən gəldi. Bəhlul özü də bu kluba keçməyə müsbət yanaşdı”.

Bəhlulla “Əl Əyn” arasında müqavilə bağlanıb, amma bəzi detalların müzakirəsi hələ də davam edir. Böyük ehtimalla, danışıqlar müsbət nəticələnəcək və 24 yaşlı müdafiəçinin yeni kluba keçidi tam rəsmiləşəcək.

“Sabah” rəsmisi Mustafazadənin transferi üçün ərəblərin nə qədər pul ödədiyini açıqlamasa da, bizdə olan məlumata görə, “Əl Əyn” Azərbaycan millisinin üzvünün keçidinə görə kifayət qədər ciddi məbləğ ödəyib.

“Əl Əyn”i ukraynalı mütəxəssis Sergey Rebrov çalışdırır.