Azərbaycan Kuboku: 1/32 final mərhələsinə yekun vuruldu

Bu gün keçirilən 9 oyunla futzal üzrə Azərbaycan kubokunun 1/32 final mərhələsinə yekun vurulub.

Komanda.az xəbər verir ki, ilk oyunda “Avanqard” rəqibinə göz açmağa imkan verməyib. Hesab da bunu göstərir. Amma ikinci oyun maraqlı keçib. “Ulduz” zəif çıxış etməsə də, son saniyələrdə hesabı bərabərləşdirmək şansını qaçırıb. Halbuki, Elşad İbrahimlinin yetirmələri bunu reallaşdıracaq gücdə idi. “Gilan Construction” isə yenilənmiş SAB-ı mübarizədən kənarlaşdırıb. Əsasən gənc futzalçılardan təşkil olunmuş SAB oyunu ilə izləyicilərin alqışını qazanıb. Günün, bəlkə də mərhələnin ən gərgin oyunu “Xəzər Astara” – “Atletiko Baku” matçı olub. Fasiləyə minimalhesablı üstünlüklə yollanan əyalət təmsilçisi ikinci hissənin əvvəlində bunu əldən versə də, sona yaxın əvvəlcə 10 metrlik zərbə ilə hesabı lehinə dəyişdirib. Qalan dəqiqələrdə daha 2 qol vuran, bir dəfə isə 10 metrlik zərbədən yararlana bilməyən “Xəzər Astara” mərhələni adlayan tərəf olub. Əsasən gənclərdən təşkil olunmuş “Füzuli” də mübarizəni davam etdirənlər sırasında yer almağı bacarıb. “Zəngilan” – “Bibi-Heybət” qarşılaşması da gərginliyi ilə yadda qalıb. Fasiləyə qədər qapılara qol vurulmayan qarşılaşmanın ikinci hissəsində nominal qonaqlar hesabı açsa da, təcrübəli Qədir Rüstəmov status-kvonu bərpa edib. Əsas vaxtda qalib müəyyənləşmədiyinə görə, komandalar hər biri 5 dəqiqədən ibarət əlavə iki hissədə mübarizə aparıb. “Bibi-Heybət” qələbəni aktivinə yazdırıb. AZMİU – “Rəvan” dueli sürprizlə başlayıb. “Tələbələr” ardıcıl 2 qol vurmaqla iddialı “Rəvan”a şok yaşadıb. 12-ci dəqiqədə Pərviz Qaraxanov penaltini qaçırsa da, komanda yoldaşları fasiləyə qədər status-kvonu bərpa edə bilib. Növbəli qol prinsipi ikinci hissədə də davam edib. 8 qol vurulsa da, qalib müəyyənləşməyib və komandalar əlavə iki hissədə gücünü sınamalı olub. Rəqibin yorğunluğundan da maksimum istifadə edən “Rəvan” 3 top fərqi ilə qalib gəlib. İkinci Liqanın lideri “Obolon” sürprizə imkan verməyib. Mərhələnin son oyunu da kifayət qədər maraqlı alınıb. Xüsusilə də “STAR karqo”nun heyətində yer alan Ramal Hüseynovu, eləcə də qardaşı Zeynalabdin Hüseynovu futbol azarkeşləri daha yaxından tanıyır. Vaxtilə milli komandanın da formasını geyinmiş Ramal indi futzal üzrə İkinci Liqada çıxış edən “STAR karqo”ya keçib. O, debütünü həm sarı, həm qolla qeyd edib. Oyun isə dramatik alınıb. “STAR karqo” sona 20 saniyə qalmış hesabı bərabərləşdirib və matç əlavə vaxta daşınıb. Əlavə vaxtda ardıcıl qollar vuran “Standard” oyunu qalib başa vurub.

Beləliklə, 1/16 finalda bu komandalar mübarizə aparacaqlar: “Green Log”, “Advokat”, “Borçalı”, ADBTİA, “Baku Fire”, “Dalğa”, “Təbriz”, “Mübariz”, “Hövsan”, “Avanqard”, “Gənclik”, “Gilan Construction”, “Xəzər Astara”, “Füzuli”, “Bibi-Heybət”, “Rəvan”, “Obolon”, “Standard”. Püşkatmanın tarixi barədə əlavə məlumat veriləcək.

Azərbaycan kuboku, 1/32 final

13 yanvar

Çinar Cəbrayıl – Avanqard 1:14

Qol: V. Baladadaşov, 03:10 – R. Novruzlu, 04:12, 08:12, 23:13,F. Fazilov, 06:28, 18:28, 19:54, 20:19, 26:53, R. Əhmədov,12:05, K. Əlixanlı, 17:06, A. Cəfərov, 26:06, Q.Nağıyev, 26:41 (ö.q), İ. İsmayıllı, 27:53, Q. Orucov, 28:17.
Hakimlər: Rahin Heybətov, Elman Musayev, Vaqif Musayev.
Olimpik Star. Saat 12:00.

Ulduz – Gənclik 2:3

Qol: B. Mirzəyev, 22:27, X. Bayramov, 27:45 (ö.q) – E. Sulxaev, 09:20, Ə. Abdullayev, 19:02, X. Bayramov, 26:23.
Hakimlər: Mehman Mahmudov, Vaqif Musayev, Elman Musayev.
Olimpik Star. Saat 13:00.

Gilan Construction – SAB 4:1

Qol: Ş. Gülüşov, 02:30, M. İsmayılov, 08:29, İ. Abbasov, 17:47, E. Məmmədov, 22:34 – E. Əliyev, 20:13.
Hakimlər: Mehman Mahmudov, Rahin Heybətov, Elman Musayev.
Olimpik Star. Saat 14:00.

Xəzər Astara – Atletiko Baku 4:1

Qol: M. Ağayev, 11:14, E. Əlizadə, 25:51, T. İmani, 26:52, Ş. Ağamətov, 27:21 – F. Hacıyev, 21:33.
Hakimlər: Azər Əsgərov, Elmir Quluzadə, Rahin Heybətov.
Olimpik Star. Saat 15:00.

Füzuli – Bədr FK Xocalı 4:1

Qol: İ. Müseyibov, 10:31, 22:11, S. Xəlilov, 19:37, E. Vahidov, 27:10 – R. Dadaşov, 26:27.
Hakimlər: Azad Hüseynov, Ramil Namazov, Elman Musayev.
Olimpik Star. Saat 16:00.

Zəngilan – Bibi – Heybət 0:0 (əlavə vaxtda 3:4)

Qol: Q. Rüstəmov, 24:58, 39:31 (ə.v), H. Hüseynov, 34:26 (ə.v) – F. Məmmədov, 19:38, İ. Rzabəyli, 31:16 (ə.v), 33:29 (ə.v), 37:54 (ə.v).
Hakimlər: Kənan Məlikov, Elmir Quluzadə, Ramil Namazov.
Olimpik Star. Saat 17:00.

AZMİU – Rəvan 8:12

Qol: H. Mustafazadə, 04:34, 20:57, F. Əhmədov, 05:59, 29:35, S. Əlişan, 21:53, 25:41, 36:54, İ. İsmayılov, 30:51(ə.v / ö.q) – R. İsmayılov, 13:40, 21:31, 27:50, V. Hüseynov, 14:15, 27:20, 34:37, Ş. Məmmədov, 16:20, İ. İsmayılov, 31:08, 35:27, 39:20, V. Bağırzadə, 31:44 (ə.v / ö.q), A. Məmmədov, 33:24.
Hakimlər: Anar Fərəcov, Hikmət Qafarlı, Elmir Quluzadə.
Olimpik Star. Saat 18:00.

Metropoliten – Obolon 3:7

Qol: R. Cəlilov, 01:44, 26:57, Ramin Nəzərov, 24:51 // E. Abbaszadə, 02:27, E. Tağıyev, 04:53, 14:41, 25:30, T. Kərimov, 08:56, Z. Kərimov, 27:45, Y. Qasımov, 29:47.
Hakimlər: Anar Fərəcov, Kənan Məlikov, Elvin Ağayev.
Olimpik Star. Saat 19:00.

Standard – STAR karqo 8:5

Qol: E. Quliyev, 07:42, S. Babayev, 14:10, 37:46 (ə.v), H. Amanov, 19:49, 21:15, 28:46, 34:17 (ə.v), 36:18 (ə.v) – M. Əliyev, 11:19, 18:24, R. Hüseynov, 14:01, Z. Hüseynov, 18:56, Ə.Məmmədov, 29:40.
Hakimlər: Hikmət Qafarlı, Anar Fərəcov, Elvin Ağayev.
Olimpik Star. Saat 20:00.