Azərbaycan sablyaçıları AÇ-də medalsız qaldılar

Estoniyanın paytaxtı Tallin şəhərində keçirilən yeniyetmə və gənclərin Avropa çempionatında qılıncoynatmanın sablya növü üzrə gənc oğlanların şəxsi yarışında qaliblər müəyyənləşib.

Komanda.az xəbər verir ki, Murad Əkbərov (4 qələbə), Maqsud Hüseynli (3 qələbə) və Saleh Məmmədov (3 qələbə) qrup mərhələsini uğurla adlayaraq pley-offa yüksəlib.

Qrup mərhələsində qələbələrin sayına görə birbaşa 32-liyə yüksələn Murad bu mərhələdə polşalı Benedikt Denkieviçzə 15:13 hesabı ilə qalib gəlib. Murad növbəti mərhələdə ən güclü 8-liyə yüksəlmək uğrunda keçirilən görüşdə turnirin qalibi Marko Mastrulloya 12:15 hesabı ilə uduzub.

Maqsud Hüseynli pley-offda keçirdiyi ilk görüşdə ispan Xayme Florezə 15:13 hesabı ilə qalib gəlsə də, ən güclü 16-lığa yüksəlmək uğrunda keçirilən görüşdə rumın Radu Nituya 6:15 hesabı ilə məğlub olub.

64-lüyə yüksələn Saleh Məmmədov bu mərhələdə ukraynalı Dmitrii Kolobaievə 4:15 hesabı ilə məğlub olub.

Ayxan Xasıyev pley-offa yüksələ bilməyib.