Ayxan Abbasov: “Belə oynayıb məğlub olanda üzülürsən”

“Şamaxı” bu gün Azərbaycan Premyer Liqasının 20-ci turunun açılış matçında “Zirə”ni qəbul edib.

Komanda.az xəbər verir ki, 1:2 hesabı ilə məğlub olan bölgə təmsilçisinin baş məşqçisi Ayxan Abbasovun oyundan sonra mətbuat konfransı keçirilib. Abbasov üzücü məğlubiyyət olduğunu bildirib:

“Üzücü məğlubiyyət oldu. Belə oynayıb məğlub olanda üzülürsən. Oyun baxımından yaxşı performans göstərdik. Bu oyunla “Zirə”yə qarşı qolları qaçırmaq üzücüdür. Çempionat davam edir. Fərdi səhvləri azaltsaq, nəticə olacaq. İnanıram ki, yaxşı olacaq. Oyunun ədalətli nəticəsinin heçə-heçə olduğunu düşünürəm.

Futbolçuların əziyyətinə görə üzülürəm. Amma digər tərəfdən də, belə performans daha yaxşı olacağının siqnalını verir. Yaxşı oyun xal vermir. Amma digər tərəfdən, bizim məqsədimiz bəllidir.

Ən çox transfer etməyimizin səbəbi, çox futbolçu bizim komandadan gedib. Yəqin ki, bir oyunçu da transfer edib kifayətlənərik”.

“Şamaxı” növbəti turda səfərdə “Neftçi” ilə qarşılaşacaq.

Fəxri Rüstəmli