“Avroliqaya vəsiqə qazanmaq niyyətindəyəm” – Rəşad Sadıqov

“Zirə”nin baş məşqçisi Rəşad Sadıqov Azərbaycan Premyer Liqasının 2-ci turu çərçivəsində “Səbail”ə qarşı keçirdikləri səfər oyununu şərh edib.

Komanda.az xəbər verir ki, 38 yaşlı mütəxəssis, oyundan sonra təşkil olunan mətbuat konfransında bunları söyləyib:

“Maraqlı və gərgin oyun alındı. “Səbail” ilk turda “Neftçi” önündə əzmkar mübarizə apardı. Bilirdik ki, sona qədər oynayacaqlar. Vacib 3 xal qazandıq. Düşünürəm ki, bunun ardını gətirəcəyik. İlk oyunla müqayisədə bu gün daha yaxşı idik. Qarşıma hansısa hədəf qoymağı sevmirəm. Hər oyuna qələbə üçün çıxırıq. Komanda olaraq düzgün addımlar atmaq istəyirik. Həmişə hər şeyin ən yaxşısını istəmişəm. Mən də Avropa Liqasına vəsiqə qazanmaq niyyətindəyəm. Hədəflərə düzgün oyunla çatmaq fikrindəyəm. Komanda şəklində yaxşı olmalı və düzgün futbol oynamalıyıq. Qələbə hər zaman şirindir, amma baxımlı oyun olanda daha yaxşı olur. Avropa arenasında daha yaxşı komandalar görə bilərik. İstəyirəm ki, komanda böyüsün. Çox keyfiyyətli futbolçularım var. Bizim komandada futbolumuzun gələcəyi olan oyunçular çoxdur. Oyunlarda daha inamlı və cəsurdurlar. Mən harada olursa-olsun, həmişə nəticə qazanmaq istəyirəm”.

Gənc çalışdırıcının sözlərinə görə, bu gün xal itirə bilərdilər: “Heç kim səhvdən sığortalanmayıb. Komandamız sonlarda rəqibin təzyiqinə dözdü. Futbolçular soyuqqanlı oldular və düzgün davrandılar. Hər oyunda pozitiv futbol sərgiləməyə çalışacağıq”.

Sadıqov, hücumçu Ağabala Ramazanovun matçda iştirak etməməsinə də aydınlıq gətirib: “Ağabala iki gün öncə məşqdə zədələndi, bizim üçün gözlənilməz oldu. Futbolda zədələr var, buna hazır olmalıyıq. Ruslan Qurbanov bu gün meydanda aldığı şansdan yaxşı istifadə etdi”.

Baş məşqçi, Ramazanovun yığmaya çağırılmaması barədə bunları deyib: “Milli komanda elə yerdir ki, təklif ola və olmaya bilər. Səbrli davranmaq lazımdır. Onun çağırılmamasına haqsız qərar demək olmaz. Hər baş məşqçinin öz seçimi var. Çalışmaq və baş məşqçinin etimadını qazanmaq lazımdır. Bunu bütün oyunçularıma demişəm”.