AVF rəsmisi İtaliya klubunun oyununa təyinat alıb

Azərbaycan Voleybol Federasiyasının (AVF) kominikasiya şöbəsinin rəhbəri Zöhrab Gözəlbəyli beynəlxalq yarışa supervayzer təyin olunub.

Federasiyadan Komanda.az-a verilən məlumata görə, qurum rəsmisi qadın voleybolçular arasında Çelenc kubokunun 1/16 finalında “Rapid Buxarest” (Rumıniya) və “Roma Volley” (İtaliya) komandalarının cavab qarşılaşmasında hakimlərin işini qiymətləndirəcək.

Noyabrın 12-də Rumıniyanın paytaxtı Buxarestdə keçiriləcək oyunu danimarkalı Morten Enqborq Kleyn və bolqarıstanlı Milena Lazarova-Pyova idarə edəcək.

Komandalar arasında baş tutan ilk matçda İtaliya təmsilçisi 3:0 hesabı ilə qalib gəlib.