“Marselo, Kazemiro və mən onun mövqeyini bağlamağı bacardıq” – Ramos

İspaniya La Liqasının 26-cu turu çərçivəsində “Barselona”ya 2:0 hesabı ilə qalib gələn “Real”ın kapitanı Serxio Ramos açıqlama verib.

Komanda.az klubun mətbuat xidmətinə istinadən xəbər verir ki, ispan müdafiəçi, qələbəni belə şərh edib:

“El klasiko”da qalib gəlmək müsbət haldır. Son nəticələrdən sonra “Barselona”ya qalib gəlmək lazım idi. Əla qələbə qazandıq. Oyunun sonunda rəqibə topla oynamaq üçün icazə verdik. Onlar topa nəzarət etsələr də, qol şansı yarada bilmədilər. Vacib üç xal qazandıq. Bundan sonra da bacardığımız qədər çox xal toplamalıyıq.

Ev oyularında azarkeş dəstəyi hər zaman kömək edir, bu oyunda da qalib gəlməkdə bizə çox kömək etdi. Artıq bu sevinci təkcə qələbələrlə deyil, titullarla da yaşamalıyıq. Səhvlərdən nəticə çıxarmalıyıq, bu, bizə inkişaf etmək üçün kömək edəcək.

Messi ən yaxşı futbolçulardan biridir. Messinin yaratdığı epizodlar hər zaman təhlükəlidir və diqqətli olmalısan. O, rəqib komandanın ən yaxşı futbolçusudur. Marselo, Kazemiro və mən onun mövqeyini bağlamağı bacardıq. Müdafiənin işi bu gün ən yüksək səviyyədə idi”.