Anri Kloppla Qvardiolanı müqayisə etdi

“Barselona”, “Arsenal” və Fransa millisinin keçmiş futbolçusu, hazırda televiziya eksperti kimi çalışan Tyeri Anri, “Liverpul”un baş məşqçisi Yurgen Kloppun əvəzedici oyunçulardan istifadə etməsindən danışıb.

Komanda.az “Sky Sports”-a istinadən xəbər verir ki, Anri, Kloppun ehtiyat oyunçular oturacağında gənclərə güvəndiyini söyləyib:

“Yurgen Klopp ehtiyat oyunçular skamyasında nəyə inanır? Digər Premyer Liqa komandalarına nəzər salsaz, ehtiyat oyunçular skamyasında otursalar da, oyuna qoşulmayacaq futbolçular var. Bəzən Pep Qvardiola heç bir dəyişiklik etmir, amma Klopp ehtiyat oyunçular skamyasında gənclər olsa belə, onlara güvənir”.

“Liverpul” hazırda İngiltərə çempionatının turnir cədvəlinə başçılıq edir (63 xal) və “Mançester Siti”ni 1 xal qabaqlayır. Premyer Liqanın liderləri arasında görüş martın 10-da baş tutacaq.