“Qarşıdakı mövsümdə Bellingemin oyunundan həzz alacağıq” – Ançelotti

“Real”ın baş məşqçisi Karlo Ançelotti “Milan”la yoldaşlıq görüşündən sonra (3:2) yarımmüdafiəçi Çud Bellingemin çıxışı haqda danışıb.

Komanda.az “Marca” nəşrinə istinadən xəbər verir ki, o, ingiltərəli futbolçunun yaxşı oynadığını söyləyib:

“Bellingem yaxşı oynadı. Onun fərdi bacarıqları komandanın keyfiyyəti ilə üst-üstə düşür. Qarşıdakı mövsümdə Çud Bellingemin oyunundan həzz alacağıq”.

İtaliyalı mütəxəssis yarımmüdafiəçi Brahim Diasdan da söz açıb:

“Brahim 10 nömrə mövqeyində oynamaq bacarığına sahibdir. Onun qarşıdakı mövsümdə komanda üçün uğurlu olacağına inanıram”.

İspaniya klubu Kərim Benzemanın komandanı tərk etməsindən sonra ilk dəfə 4-3-1-2 taktiki sxemində oynayıb.

La Liqa təmsilçisi növbəti yoldaşlıq görüşü çərçivəsində iyulun 27-də “Mançester Yunayted”lə, “Milan” isə iyulun 28-də “Yuventus”la qarşılaşacaq.