“O, başqalarının görmədiyini görür” – Alleqri

“Yuventus”un baş məşqçisi Massimiliano Alleqri UEFA Avropa Liqasının 1/16 finalının “Nant”la cavab oyunundan sonra (3:0) açıqlama verib.

Komanda.az “La Gazette dello Sport”-a istinadən xəbər verir ki, o, cütün taleyini həll edən və het-trikə imza atan Anxel Di Mariya barədə danışıb:

“Oyundan məmnun qaldım. Asan matç deyildi. Fransalı azarkeşlər çox həvəsli idilər. Yaxşı oynadıq. Anxel di Mariya kimi futbolçular komandanın ümumi səviyyəsini artırır. O, başqalarının görmədiyini görür. Müxtəlif kateqoriyalara məxsus futbolçular var. Di Mariya çempionlar kateqoriyasına aiddir.

Avropa Liqasına Çempionlar Liqasından gəlməyimiz heç də bütün matçlarda asan qələbə qazanmaq mənasını vermir. Turnirə hörmətlə yanaşmalıyıq”.

İki oyunun nəticəsinə əsasən, “qoca sinyora” Liqa 1 təmsilçisini 4:1 hesabı ilə məğlub edərək, növbəti mərhələyə vəsiqə qazanıb.

“Yuventus”un 1/8 finaldakı rəqibi bu gün keçiriləcək püşkatmadan sonra məlum olacaq.