“Malyorka”nın futbolçusu irqçiliyə məruz qalan Vinisiusu müdafiə etdi

“Malyorka”nın müdafiəçisi Pablo Maffeo “Real”ın hücumçusu Vinisius Juniorun İspaniyada vaxtaşırı məruz qaldığı irqçi təhqirlərdən danışıb.

Komanda.az “Mundo Deportivo”-ya istinadən xəbər verir ki, ispaniyalı futbolçu bunun xoşagəlməz olduğunu bildirib:

“İrqçilik Vinisiusa təsir edir, bu, xoşagəlməzdir. Afrikaya getsəm və orada məni təhqir etsələr, bundan xoşum gəlməyəcək. Ona təsir edir. Vinisius bunu vurğulayır və məncə, o, düzgün iş görür. Çünki o, həqiqətən ciddi bir şeylə mübarizə aparır.

Düşünmürəm ki, o, təhqir etmək üçün təxribat törədir. Vinisius bəzi şeylərdə səhv edir, hamımız kimi, oyunçularla və ya hakimlərlə danışıq tərzi kimi. Bununla belə, onun irqçilik problemi üzərində oynadığını düşünmürəm”.