AFFA 3 klubu cərimə etdi

AFFA İntizam Komitəsi Azərbaycan Premyer Liqasının 11-ci turunda keçirilən oyunlarda baş vermiş neqativ hallara görə 3 klubu cərimə edib.

Komanda.az xəbər verir ki, “Sumqayıt” 1800 manat ziyana düşüb. Təcili tibbi yardım avtomobili “Qəbələ” ilə matça (0:0) təyin edilmiş vaxtdan gec gəldiyi üçün Sumqayıt təmsilçisi 1000 manat xərc çəkməli olacaq. Qarşılaşma bitdikdən sonra meydana kənar şəxslərin daxil olması klubun daha 800 manat cərimələnməsinə səbəb olub.

“Qarabağ”ı 2:1 hesabı ilə məğlub edən “Araz-Naxçıvan”ın 6 futbolçusunun sarı vərəqə alması klubun 700 manat cərimə ilə üzləşməsinə gətirib çıxarıb. Beş futbolçusu sarı vərəqə alan “Qarabağ” da eyni məbləğdə cərimə ödəyəcək.