Adəə, bunu demisən!

Rəşad Ergün

Üzünə müdrik ifadə verib, gözlərini əvvəlcə tavana, sonra kompüterin monitoruna zilləyib, yazmaq istəyirsən…

AFFA prezidenti Rövnəq Abdullayev 2008-ci ildən üzü bəri Azərbaycan futbolunun təpəsinə…

İçindən bir səs hayqırır:

– Adəə, bunu yazmısan!

Silirsən, yeni cümlə qurmaq istəyirsən…

AFFA-nın baş katibi, icraçı vitse-prezidenti Elxan Məmmədov 2007-ci ildən Azərbaycan futbolunun başına…

İçindən yenə bir səs gəlir:

– Adəə, bunu da demisən!

Lənət şeytana! Təslim olmaq yoxdur, davam!

Futbol üzrə Azərbaycan milli komandası yenə seçmə mərhələni bir xalla…

Yenə o səs eşidilir:

– Adəə, vallah, bunu da demisən!

Üzündəki müdrik ifadəyə bir az məyusluq, bir az da qəzəb qarışır. Başını əllərinin arasında sıxıb, düşünürsən, düşünürsən. Aha, tapdım!

Azərbaycanda bölgə futbolu məhv edilib, Premyer Liqadakı 8 klubdan 7-si Bakını və…

Yenə lənətə gəlmiş o səs:

– Adəə, bunu da yazmısan!

Olsun, eybi yox. Onda əvvəlcə özlərini, sonra da Azərbaycan futbolunu AFFA rəhbərliyinin ayırdığı məvacibə, təqaüdə satan veteranlardan yazaram:

İsgəndər Cavadov, Kazbek Tuayev kimi…

İçindəki səs susmur:

– Adəə, bunu da yazmısan da, yadından çıxıb?

Bəlkə, aşağı yaş qrupları üzrə milli komadalar? Niyə də yox? Yazmağa başlayırsan:

Azərbaycanda uşaq futbolu ölüb, aşağı yaş qrupları üzrə milli komandaların oyunları və nəticələri…

İçindəki səs bağırır:

– Yazmısan, adəə, bunu da yazmısan!

Yaxşı… Onda yaxşı bir şey yazaq.

Azərbaycanda “Qarabağ” klubundan başqa…

İçindəki səs bu dəfə pıçıltı ilə çıxır:

– Adəə, bunu hamı deyir.

Üzündəki müdrik ifadədən əsər-əlamət yoxdur. Sadəcə məyusluq var: yaxşı, nədən yazaq?

İçindəki səs kədərlə dillənir:

– Adə, yaz ki, Azərbaycanda futbol 15 ildir ölüb, niyə buna bir dənə başdaşı qoymamısız?