Lukaku “İnter”in futbolçularının zənglərinə cavab vermir – Açıqlama

“İnter”in hücumçusu Lautaro Martines “Çelsi”nin forvardı Romelu Lukaku haqda danışıb.

Komanda.az “La Gazzetta dello Sport”-a istinadən xəbər verir ki, o, başa çatan mövsümü icarə əsasında “İnter”də keçirən belçikalı futbolçunun “Yuventus”la danışıqlar aparması ilə bağlı yayılan xəbərlərə münasibət bildirib:

“Doğrusu, bunu eşidəndə məyus oldum. Lukaku ilə əlaqə saxlamaq üçün ona zəng vurdum, lakin cavab vermədi. O, “İnter”in digər futbolçularının da zəngini cavabsız qoymuşdu. Nə demək olar? Bu, onun şəxsi seçimidir. Romeluya hər şeyin ən yaxşısını arzulayıram. Açığı, ondan belə davranış gözləmirdim”.

“İnter” azarkeşləri Lukakunun “Yuventus”a mümkün keçidi ilə bağlı açıqlama yaymışdılar. Turin təmsilçisinin fanatları da 30 yaşlı futbolçunun transferinə müsbət münasibət göstərməyiblər.

Lukaku 2022/23 mövsümünü icarə əsasında “İnter”də keçirib. O, bütün turnirlər daxil olmaqla 37 oyuna çıxıb, 14 qol vurub və 7 məhsuldar ötürmə edib.