AÇ: Sabir gümüş, Səbuhi bürünc medal qazandı

İtaliyanın paytaxtı Romada güləş üzrə U-20 Avropa çempionatı davam edir.

Komanda.az xəbər verir ki, beşinci yarış günündə 57, 65, 70, 79 və 97 kq-da yer alan sərbəst güləşçilər mübarizəyə qoşulub.

Nurəddin Novruzov (57 kq) ilk mərhələdə türkiyəli Ahmet Karavuşa sonuncu xal prinsipinə əsasən məğlub olub – 10:10.

Əbülfəz Nəsirov (65 kq) 1/8 finalda bolqarıstanlı Ruhan Rasimə qalib gəlib – 7:3. Ancaq 1/4 finalda Belçikanı təmsil edən Ayub Musayevə uduzub – 1:4. Rəqib finala yüksəldiyi üçün Nəsirov təsəlliverici görüşdə iştirak hüququ qazanıb. Əbülfəz gürcüstanlı Luka Janezaşviliyə 10:20 hesabıyla yenilərək mübarizəni başa vurub.

Sabir Cəfərov (70 kq) startda Muhəmməd Abdurəhmanovdan (Belçika) güclü olub – 5:0. Həmyerlimiz 1/8 finalda almaniyalı Adrian Barnovskini yolundan kənarlaşdırıb – 5:4. Sabir 1/4 finalda avstriyalı Benedikt Huberi tam üstünlüklə məğlub edib – 11:0. Yarımfinalda italiyalı Raul Kasoya 3:0 hesabıyla qalib gələn Cəfərov finala yüksəlib. Həlledici görüşdə son saniyələrdə erməni Hayk Papikyana minimal fərqlə (2:3) uduzan Sabir gümüş medalla kifayətlənib.

Səbuhi Əmiraslanov (79 kq) 1/8 finalda latviyalı Daniels Bendiksə heç bir şans tanımayıb – 10:0. Pəhləvanımız 1/4 finalda türkiyəli Hakan Satılmışa gücünü göstərib – 5:2. Yarımfinalda ermənistanlı Muşeq Mkrtçyana (1:3) uduzan Əmiraslanov bürünc medal uğrunda rumıniyalı Gigi Subtiriçayla güləşib və rəqibinə heç bir şans tanımayıb – 11:0.

Varis Mehdizadə (97 kq) debütdə almaniyalı Yusuf Şenyiğitə qalib gəlib – 4:7. Lakin növbəti mərhələdə türkiyəli Mücahit Çeliklə bacarmayıb – 0:10. Mehdizadə bürünc medal uğrunda gürcüstanlı Luka Xutçuayla qarşılaşıb və bu rəqibinə də məğlub olub – 5:13.

Beləliklə, sərbəst güləşçilərimiz Avropa çempionatına 1 gümüş və 1 bürünc medalla start verib.