İlham Əliyev: “Merihə qarşı tətbiq edilən cəza ədalətsizdir”

Azərbaycan Respublikasının prezidenti İlham Əliyev X sosial şəbəkəsində paylaşım edib.

Komanda.az xəbər verir ki, ölkə başçısı Türkiyə milli komandasını AÇ-2024-də 1/4 finala yüksəlməsi münasibətilə təbrik edib. İlham Əliyev həmçinin, Avstriya ilə matçda “bozqurd” simvolu göstərdiyi üçün Merih Demirala verilən 2 oyunluq cəzanın ədalətsiz olduğunu bildirib:

“Almaniyada keçirilən futbol üzrə Avropa çempionatında uğurla çıxış edən qardaş Türkiyə milli komandasını 1/4 mərhələyə vəsiqə qazanaraq 8 ən güclü Avropa millisi arasında yer alması münasibətilə təbrik edirəm.

Xüsusilə, 1/8 final mərhələsində 2 qol vuraraq oyunun ən yaxşı futbolçusu seçilmiş Merih Demiralı təbrik edirəm. Merihə qarşı tətbiq edilən cəza ədalətsizdir və bunu qətiyyətlə pisləyirəm. Türkiyə millisinə Niderland ilə oyunda qələbə arzu edirəm! Yaşasın Türk dünyası!”