Azərbaycan güləşçiləri Bolqarıstanda daha 3 medal qazandılar

Bolqarıstanın Veliko Tırnovo şəhərində güləş üzrə Dan Kolov – Nikola Petrov xatirə turniri davam edir.

Komanda.az xəbər verir ki, yarışın 2-ci günündə 4 sərbəst güləşçimiz mübarizəyə qoşulub.

Əfqan Xaşalov (57 kq) 1/8 finalda Arun Aruna (Hindistan) “tuşe” ilə qalib gəldikdən sonra iranlı Rza Momenijuzadəni də vaxtından əvvəl üstələyib – 10:0. Xaşalov yarımfinalda hindistanlı Aman Amanla qarşılaşmada zədələndiyindən görüşü məğlub başa vurub.

Əliabbas Rzazadə (57 kq) startda bolqar İvaylo Tısova heç bir şans verməyib – 10:0. Ancaq həmyerlimiz belaruslu Ariyan Tiutrinlə görüşdə son saniyələrdə üstünlüyü əldən verərək məğlub olub – 6:8. Əliabbas fevralın 19-da keçirilən təsəlliverici görüşdə gürcü Qoqa Ciquaya “tuşe” ilə qalib gəlib. Rzazadə amerikalı Niko Provonu isə cəmi 45 saniyəyə tam üstünlüklə məğlub edərək (10:0) bürünc medala sahib çıxıb.

Turan Bayramov (74 kq) təsnifat mərhələsində bolqar Mixail Georgiyevi məyus etdikdən (3:0) sonra Bolqarıstanın digər təmsilçisi Aykan Seidə tam üstünlüklə qalib gəlib – 12:0. Bayramov 1/4 finalda əlcəzairli Abdelkader İkkaldan güclü olub – 6:0. Macar Murad Kuramqomedovla görüşdə yekun hesab 1:1 olub və sonuncu xalı Turan aldığı üçün həmyerlimiz finala yüksəlib.

Mübarizəyə 1/8 finaldan qoşulan Cəbrayıl Hacıyev (74 kq) qazaxıstanlı Sultan Jaksiliki “tuşe” ilə yolundan kənarlaşdırdıqdan sonra gürcü Dimitri Jioeviyə də vaxtından əvvəl qalib gəlib – 12:1. Cəbrayıl yarımfinalda bolqarıstanlı Ali-Paşa Umarpaşayev üzərində 8:3 hesablı qələbə qazanaraq finala yüksəlib.

Fevralın 19-da 74 kq-da finalda millimizin iki üzvü qarşılaşıb. Turana 3:1 hesabıyla qalib gələn Cəbrayıl qızıl medal qazanıb.