“4:0 hesabı ilə qalib gəlmək fantastikdir” – Klopp

“Liverpul”un baş məşqçisi Yurgen Klopp Avropa Liqasının qrup mərhələsinin 5-ci turunda LASK üzərində qazanılan qələbəni (4:0) şərh edib.

Komanda.az UEFA-nın mətbuat xidmətinə istinadən xəbər verir ki, alman mütəxəssis yaxşı futbol oynadıqlarını bildirib:

“Ən əsası odur ki, qrupa rəhbərlik edirik və bu dəyişməyəcək. Oyunda yaxşı şeylər çox idi, amma bəyənmədiyim şeylər də oldu. Biz bunu hər zaman deyirik: böyümək və inkişaf etmək lazımdır. Yaxşı futbol oynadıq, amma bu oyunun taleyini fasiləyə qədər həll etmək lazım idi. 2:0 və 3:0 hesabları ilə bir az da “açıldıq” və rəqibə şans yaratmağa imkan verdik. 4:0 hesabı ilə qalib gəlmək fantastikdir”.

“Liverpul” 12 xal toplayıb və Avropa Liqasının pley-off mərhələsinə erkən yüksəlib. LASK 3 xalla sonuncu yerdədir.