“Qarabağ”ın mübarizə aparacağı Konfrans Liqası nədir? – “Köhlən atlar”ı yeni turnirdə nə gözləyir?

2021/22 mövsümündən UEFA-nın bayrağı altında yeni turnirin – Avropa Konfrans Liqasının (KL) keçirilməsinə başlanacaq.

Komanda.az xəbər verir ki, yeni yaradılan turnirdə artıq daha çox oyunlar keçiriləcək, Avropanın daha çox klublarının iştirakı təmin ediləcək. Belə ki, Avropa Konfrans Liqasında UEFA-ya üzv olan 55 ölkənin hər biri təmsil olunacaq.

Avropa Konfrans Liqasında əvvəlcə UEFA-nın reytinq siyahısında aşağı pillələrdə olan – 30-55-ci yerlərdə olan ölkələrin klubları ilk təsnifat mərhələsində mübarizə aparacaq. Qaliblər növbəti – 2-ci təsnifat mərhələsinə vəsiqə qazanacaq. Azərbaycan klubları da yeni turnirdə mübarizəyə məhz bu mərhələdən başlayacaq.

Azərbaycan Premyer Liqasının gümüş və bürünc medalçısı – “Qarabağ” və “Sumqayıt”la ölkə kubokunun qalibi olan komanda turnirin 2-ci təsnifat mərhələsindən mübarizəyə başlayacaq. Ölkə kubokunun finalında olan “Sumqayıt” həlledici matçda “Keşlə”ni məğlub etsə, Konfrans Liqasına “Zirə” yollanacaq. Premyer Liqanın qalibi olan “Neftçi” Çempionlar Liqasına, digər mükafatçılar isə Konfrans Liqasına gedəcək. “Ağ-qaralar” Çempionlar Liqasının 2-ci təsnifat mərhələsində mübarizəni dayandırıb, Avropa Liqasının da 3-cü təsnifat mərhələsində məğlub olsa, Konfrans Liqasının pley-off mərhələsinə qoşulacaq. Azərbaycan çempionu Avropa Liqasının pley-offuna qədər irəliləyib, orda uduzsa, bu zaman Konfrans Liqasının qrup mərhələsində oynamaq hüququ qazanacaq. Azərbaycan çempionu ÇL-də 1-ci təsnifat mərhələsini keçə bilməsə, bu zaman əvvəlki kimi Avropa Liqasının deyil, Konfrans Liqasının 2-ci təsnifat mərhələsində mübarizə aparacaq.

KL-da üç təsnifat mərhələsini keçən komandalar pley-offda mübarizə aparacaq. Burda qalib adını qazananlar 32 komandadan ibarət 8 qrup halında mübarizə aparacaqlar. Qrup qalibləri turnirin 1/8 final mərhələsinə yüksələcək. Qruplarda ikinci olan komandalar isə Avropa Liqasının qruplarını 3-cü sırada bitirənlərlə pley-off oynayacaq və qalib tərəf 1/8 finala yüksələcək. Ardınca isə 1/4, yarımfinal və final matçlarından sonra turnirin qalibi müəyyənləşəcək.

Konfrans Liqasında ilk təsnifat mərhələsinin oyunları iyulun 8-də keçiriləcək. Turnirin qalibi yeni mövsümdə Avropa Liqasının qrup mərhələsinə vəsiqə qazanmış olacaq. Konfrans Liqasının ilk final matçı Albaniyanın Tirana şəhərində keçiriləcək. Qarşılaşma 2022-ci il, mayın 22-də olacaq.

Yeni mövsümdə Konfrans Liqasının yaradılması ilə Avropa Liqasında komanda sayı azaldılacaq. Belə ki, AL-də artıq 48 deyil, 32 komanda yarışacaq. Turnirin ilk iki təsnifat mərhələsi ləğv olunub və yarışa 3-cü təsnifat mərhələsindən start veriləcək. Yeni mövsümdə Avropa Liqasında UEFA reytinqinin ilk 15 sırasında yer alan ölkələrin klubları mübarizə aparacaq. Azərbaycan UEFA reytinqində 26-cı olduğu üçün klublar Avropa Liqasında deyil, Konfrans Liqasında iştirak edəcək.