Əsgərovdan daha bir dubl və bombardirlik

Futbol üzrə Latviya çempionatında 8-ci turun oyunları keçirilib.

Komanda.az xəbər verir ki, azərbaycanlı futbolçular – Vüqar Əsgərov, Elvin Sərkərov və Tural Bayramlının formasını geyindiyi “Dauqavpils” də növbəti matçına çıxıb.

Sözügedən kollektiv doğma meydanda “Spartak”la üz-üzə gəlib. Futbolçularımızın komandası bu oyundan qələbə ilə ayrılıb – 4:1.

Azərbaycanlı futbolçulardan ikisi – Vüqarla Tural da bu matçın iştirakçısı olub. Onlar start heyətdə meydana çıxıb. Əsgərov sonadək oynadığı halda, Bayramlı 56-cı dəqiqədə əvəzlənib. Elvinin adı isə ümumiyyətlə bu matçın iştirak ərizəsinə daxil edilməyib.

Komandasının vurduğu qollardan ikisinə Vüqar imza atıb. O, 20-ci dəqiqədə hesabı 1:1 edib. Millimizin sabiq forvardı 32-ci dəqiqədə daha bir qol vurmaqla ardıcıl iki oyunda dubl edib və cari mövsümdə vurduğu topların sayını 5-ə çatdırıb. Bu, həm də Əsgərovu Latviya çempionatının bombardirlər yarışında ilk sıraya çıxarıb.

“Dauqavpils” hazırda 10 xalla 9 komanda arasında 4-cü pillədə qərarlaşıb.