Tərlan Əhmədov: “Onun bu hərəkəti bağışlanmazdır”

“Keşlə”nin baş məşqçisi Tərlan Əhmədovun Azərbaycan Premyer Liqasının 1-ci turunda “Qarabağ”la qarşılaşdıqları oyundan sonra mətbuat konfransı keçirilib.

Komanda.az xəbər verir ki, Əhmədov 0:1 hesabıyla məğlub olduqları oyunu belə şərh edib:

– Oyunun əvvəlində həyəcan var idi. Komanda getdikcə həyəcanını atmağa başladı. Sürətli hücumların hesabına keçməliydik rəqibi. Qırmızı vərəqə bütün planlarımızı pozdu. Ümumilikdə normal mübarizə apardıq. Komandanın mübarizəsi ürəyaçan idi.

Emin Mehdiyevə cəza veriləcəkmi?

– Futbolçularıma həmişə demişəm ki, üzbəüz mübarizədə qırmızı vərəqə alsaz, onu öz cibimdən ödəyərəm. Ancaq futbolçu elə etməlidir ki, komandaya zərər verməsin. Onun bu hərəkəti bağışlanmazdır.

Eminin yerinə başqa təcrübəli futbolçunu oyuna daxil edə bilməzdiz?

– Siz başqa tərəfdən baxırsız, biz başqa. Ruslan Qurbanov yorulmuşdu. Əmircanov uzun müddətdir ki, oynamır, Sadiqovun da mövqeyi deyildi. Bu məsələlər getdi artıq. Oyundan oyuna inkişaf etməliyik. Bu səhvlər təkrarlanmamalıdır.

Ruslan Qurbanovun hazırlığında nə problem var?

– Onun bir az zədələri oldu. Bu gün də onun təcrübəsindən istifadə etmək istəyirdik. 90 dəqiqə meydanda qala bilməyəcəyini bilirdim. Onu ilk hissədə dəyişmək istəyirdim, ancaq etmədim.

Bu çempionatda hədəfiniz nədir?

– Qarşımıza mükafatçılar sırasında olmaq hədəfi qoyulub. Əfranı da heyətimizə qatmışıq. Bu oyun bizə ümid verdi.

– Əfranın tam hazır olması üçün nə qədər zaman lazımdır?

– Formasından uzaqdı. Onu milli komandanın oyunundan sonra meydanda görə bilərsiz.

Transferlər gözlənilirmi?

– Xeyr.