Tərcümə

FutbolİSTƏR

Mövsümün sonuna yaxın. “Neftçi”də təcili iclas keçirilir. İclasda klubun prezidenti Kamran Quliyev, idman direktoru Ceyhun Sultanov, baş məşqçi Roberto Bordin azərbaycanlı və moldovalı tərcüməçiləri ilə, “ağ-qaralar”ın mətbuat xidmətinin rəhbəri Rüstəm Allahverdiyev, futbolçu Mirabdulla Abbasov iştirak edir. Uzunsov masanın başında Quliyev, sağında Sultanov, solunda Bordin, onun da yanında iki tərcüməçisi əyləşib. Allahverdiyevlə Abbasov isə masanın orta hissəsində, üz-üzə oturublar.

Kamran Quliyev boğazını arıtlayandan sonra qarşısına qoyulmuş stəkandakı sudan içir. Sonra bayaqdan sol əlində tutduğu telefonu səssiz rejimə qoyub, Allahverdiyə başıyla işarə edir. Allahvediyev Bordinin azərbaycanlı tərcüməçisinin qulağına pıçıldayaraq, telefonları səssizə qoymaq lazım olduğunu deyir. Azərbaycanlı tərcüməçi Allahverdiyevin dediklərini moldovalı tərcüməçiyə deyir, o da Bordinə doğru əyilərək, telefonun səsini almasını bildirir. Quliyev, Sultanov və Abbasov bütün bunları sakitcə izləyir.

Klub prezidenti telefonların səssizə alındığını görəndən sonra yenə qarşısındakı stəkanı qaldırıb, qurtultu ilə içir. Quliyev stəkanı yerə qoyub, sözə başlayır:

  • Bu gün bura yığışmağımızda məqsəd, çempionatın qalan turlarında komandamızın hazırlığını, problemləri müzakirə etməkdir.

Quliyev cümləsini bitərən kimi, Allahverdiyev azərbaycanlı tərcüməçiyə başıyla işarə edir, o da deyilənləri moldovalı tərcüməçinin qulağına pıçıldamağa başlayır. İki tərcüməçi arasında pıçıldaşma bitəndən sonra moldovalı tərcüməçi Bordinə tərəf əyilib, Quliyevin sözlərini onun üçün tərcümə etməyə başlayır. Bütün bunlar 3 dəqiqəyə yaxın davam edir.

Moldovalı tərcüməçi son sözləri də Bordinə tərcümə edəndən sonra, italiyalı mütəxəssis başıyla razılıq ifadə edir. Kamran Quliyev Bordinin baş hərəkətindən sonra davam edir:

  • Bilirsiniz ki, bizim qarşımızda duran əsas vəzifə mövsümün sonunda çempion olmaq və Çempionlar Liqasına vəsiqə qazanmaqdır. Bunun üçün hamımız yumruq kimi birləşməliyik.

Rüstəm Allahverdiyev bütün diqqətiylə klub prezidentinin ağzına baxır, onun “birləşməliyik” sözündən sonra pauza verdiyini görüb, tez azərbaycanlı tərcüməçiyə başıyla “başla” işarəsi verir. Azərbaycanlı tərcüməçi Quliyevin dediklərini moldovalıya tərcümə etməyə başlayır. Tərcüməçilər arasında pıçıldaşma olarkən geniş otaqdan Kamran Quliyevin artıq üçüncü dəfə su içərkən çıxardığı qurtultu səsləri, saatına baxan Ceyhun Sultanovun narazılıq ifadə edən fısıltısı, Mirabdulla Abbasovun da səssiz rejimdə saxladığı telefonunun düymələrinə toxunuşundan yaranan səslər eşidilir. Hiss olunur ki, Abbasov kimləsə mesajlaşır və həm də tələsir. Bu məqamda moldovalı tərcüməçi Quliyevin sözlərini Bordin üçün tərcümə edib, bitirir. Bu dəfə tərcümə prosesi 4 dəqiqəyə yaxın davam edir. Kamran Quliyev Bordinin növbəti dəfə başıyla razılıq ifadə etməsini görüb, çıxışını davam etdirir:

  • Dünən Elxan məllimlə danışdıq (AFFA-nın baş katibi Elxan Məmmədovu nəzərdə tutur), hamınıza salamı var (bax, Quliyev bunu yalan deyir, Məmmədov Rüstəm Allahverdiyevə, ya da iki tərcüməçiyə salam göndərməz). Deyir ki, bu mövsüm mütləq Çempionlar Liqasına getməlisiz. Söz verdi ki, Çempionlar Liqasına getsək, xahiş edəcək, büdcəmizi artıracaqlar.

Allahverdiyev Quliyevin pauzasını görən kimi, başıyla işarə edərək, azərbaycanlı tərcüməçiyə tərcümə etməsini göstərir. Azərbaycanlı tərcüməçi moldovalı tərcüməçinin qulağına pıçıldamağa başlayır. Yenə geniş otaqdan təcrcüməçilərin pıçıltısıi, Kamran Quliyevin növbəti dəfə su içərkən çıxardığı qurtultu, Ceyhun Sulatnovun narazılıq ifadə edən fısıltısı, Mirabdulla Abbasovun telefonun düymələrinə toxunuşundan yaranan səslər eşidilir. Nəhayət, moldovalı tərcüməçi ağzını Bordinin qulağından çəkir. Bordin yenə razılıqla başını tərpədir və Quliyev davam edir:

  • Siz də bilirsiniz ki, bizim klub bir çox layihələrdə iştirak edir, bir neçə dünyaca tanınmış şirkətlə əməkdaşlıq edirik. İndi bizim əsas istəyimiz, hədəfimiz o olmalıdır ki, komanda olaraq yaşıl meydanlarda da uğur qazanaq. Azərbaycan futbolunda ancaq bir komanda olmalıdır, o da “Neftçi”!

Quliyev son cümləni deyərkən, əlini masanın kənarına çırpmağı da unutmur. Mirabdulla Abbasov Quliyevin masaya endirdiyi zərbədən diksinmiş kimi olur, başını bir anlıq telefondan çəkib, sonra yenə yazmağa davam edir. Rüstəm Allahverdiyev üzündə Quliyevin son sözlərindən cuşa gəlmiş bir ifadəylə, qalib ədası ilə azərbaycanlı tərcüməçiyə işarə edir. Azərbaycanlı tərcüməçi moldovalı tərcüməçinin qulağına tərəf əyilir və başlayır… Pıçıltı, qurtultu, fısıltı, telefon düymələrindən çıxan səslər otağı bürüyür. Arada Ceyhun Sultanovun dodaqaltı mızıldandığını da görmək olar. Dodaqlarının hərəkətindən elə başa düşmək olar ki, “Allah bəlanızı versin” deyir.

Təxminən 5 dəqiqə davam edən tərcümə prosesi bitəndən sonra klub prezidenti yenə danışmağa başlayır:

  • Bu gün iclasa gələndə çempionatda qalan oyunlarımızın siyahısına baxdım. Biz bu oyunların hamısında qalib gəlməliyik! Mən istərdim ki, hörmətli baş məşqçimiz bununla bağlı bizə öz fikirlərini bildirsin.

Vəssalam! Bu dəqiqəyə kimi tərcümə prosesi 4-5 dəqiqə davam edirdisə, bundan sonra 9-10 dəqiqə çəkəcək. Axı Bordinin fikirlərini də tərcümə etdirib çatdırmaq var. Vay-vay, yazıq Sultanov, yazıq Abbasov… Parttt! Əlin zərblə masaya çırpılmasından çıxan səsdir bu səs. Biz Ceyhun Sultanovun hirslə ayağa qalxdığını görürük. Hamı heyrət içində idman direktoruna baxır:

  • Kamran məllim, icazənizlə mən çıxıram.

Quliyev təəccüb içində soruşur:

  • Niyə?

Sultanov artıq masanın arxasından durub və qapıya doğru yaxınlaşır:

  • Çempionat bitdi,  Kamran məllim, gedirəm kuboku götürüm.

Hazırladı: Kürşad