“Sabah” və futbolçusu 50-yə çatdı

“Sabah” tarixində 50-ci məğlubiyyətini alıb.

Komanda.az xəbər verir ki, bu, komandanın 101-ci görüşünə təsadüf edib. Bakı təmsilçisi Premyer Liqanın 18-ci turunda “Neftçi” ilə səfər görüşündə 1:2 hesabı ilə uduzub. İndiyədək 1-ci divizion, Azərbaycan kuboku və Premyer Liqada mübarizə aparan komanda bu müddətdə 29 qələbə qazanıb və 22 heç-heçə edib.

2017/18 mövsümündə 1-ci divizionda debüt edən “Sabah” aşağı dəstədə 9, ölkə kubokunda 6, Premyer Liqada 35 dəfə məğlubiyyət acısı yaşayıb.

Aleksey İsayev Premyer Liqada 50-ci görüşünü keçirib. 2018/19 mövsümündə “Sumqayıt”ın heyətində ilk çempionat görüşünə çıxan futbolçu “gənclik şəhəri” təmsilçisində 38, “Sabah”da 12 qarşılaşmada iştirak edib. O, yeganə qoluna da paytaxt təmsilçisində imza atıb.