Qurban Qurbanov: “Qol buraxmamağımız məni sevindirir”

Azərbaycan Premyer Liqasının 3-cü turunun son qarşılaşmasında “Səbail” üzərində səfərdə 4:0 qələbə qazanan “Qarabağ”ın baş məşqçisi Qurban Qurbanov mətbuat konfransı keçirib.

Komanda.az xəbər verir ki, təcrübəli mütəxəssis əvvəlcə oyun haqda fikirlərini bölüşüb.

  • Futbolçularımı təbrik edirəm. Həm qalib gəldik, həm də yaxşı oyun oldu. Oyunçularım çox istəkli idilər. Aftandilə qarşıdakı oyunlarda uğurlar arzulayıram. Rəqib ilk dəqiqələrdə aqressiv idi, yaxşı pressinq tətbiq edirdilər.
  • Şehiçin keçidi nə yerdədi?
  • Razılıq yoxdu. Başqa variantlar var. Hazırda danışıqlar gedir.
  • Başqa mövqeyə də transfer gözlənilir?
  • Daha iki mövqeyi də gücləndirmək istəyirik.
  • Oyunun ilk dəqiqələrində Ağabala futbolçularınıza qarşı çox aqressiv idi. Nə fikirləşdiniz?
  • Heç bir şey. Ağabala aqressiv futbolçudu.
  • 1:0, 3:0, 4:0. “Qarabağ”ın müdafiə xətti belə güclüdü, yoxsa Azərbaycan çempionatındakı komandaların hücum potensiallı aşağıdı?
  • Futbolçularımız səliqəli oynayır, tapşırıqları yerinə yetirirlər. Bu gün qol buraxmırıq, deyirik müdafiəmiz əzəmətlidi, sabah bir neçə qol buraxacağıq və deyiləcək ki, zəifdi müdafiəmiz. Sadəcə, hər oyuna maksimal konsentrasiya ilə yanaşmalıyıq. Amma qol buraxmamağımız məni sevindirir.
  • Yaranan fasilə komandanıza necə təsir göstərəcək?
  • Düşünürəm ki, millilərə getməyən futbolçularıma müsbət təsir edəcək. Ancaq milli üzvləri ağır oyunlara gedir və bu, əlavə psixoloji yüklənməyə səbəb olacaq.
  • Çempionatın ən formada olan rəqibin qapısına 4 top vurursunuz, “Neftçi”dən 5 xal öndəsiniz. Çempionat bitdi?
  • Cəmi bir məğlubiyyət və fərq 3 xal azalır. Ümumiyyətlə, belə fikirdən uzağam. Dəfələrlə şahidi olmuşuq ki, kimsə 7-8 xal öndə olub, lakin sonra çempion ola bilməyib. Qarşıda xeyli oyunlarımız var. Özü də olduqca ağır. Bir neçə futbolçumuz zədələnir, bir neçəsi vərəqə limitini doldurur və bəzən futbolçu qıtlığı yaşayırıq. Üstəlik, hər bir rəqib bizə qarşı xüsusi motivasiyalı olur.
  • “Qarabağ” daha rəngarəng olub?
  • Hər il dəyişiklik olur. Futbolda sürət artır. Topa sahib olmaq çox önəmlidi. Yaxşılığa doğru addım atmaq istəyirik. Bir şey var ki, biz rəqib imkan verdiyi qədər hücum edirik. Bu il avrokuboklarda qarşılaşdığımız bütün rəqiblərə qarşı bizə çətin oldu.

Aygül Qarayeva

Bizi Telegramda izləyin

Bizi Facebook-da izləyin

Əlaqəli yazılar

Back to top button