DÇ-2024 üçün 6 ölkə namizəddir

2024-cü ildə keçiriləcək futzal üzrə dünya çempionatının Avropa zonası üzrə əsas mərhələsinin püşkü iyulun 6-da atılacaq.

Komanda.az xəbər verir ki, Azərbaycan millisi mübarizəyə məhz bu mərhələdən başlayacaq.

Avropa üzrə 36 komanda elit-raunda yüksəlmək uğrunda yarışacaq. Yekunda isə 7 (əgər mundial Avropa ölkələrindən birində keçirilməsə) komanda final mərhələsində Avropa qitəsini təmsil etmək hüququ qazanacaq. Mundiala evsahibliyi edəcək ölkənin adı bilinməsə də, bu iddiada olan federasiyaların bir neçəsi müəyyənləşib. Belə ki, Asiyadan İran və Hindistan, Afrikadan Mərakeş, Şimali Amerika, Mərkəzi Amerika və Karib hövzəsi Futbol Assosiasiyaları Konfederasiyasından isə ABŞ, Meksika və Qvatemala 2024-cü ildə təşkil olunacaq final mərhələsini qəbul etmək üçün müraciət edib.

Xatırladaq ki, Azərbaycan millisi ilk dəfə 2016-cı ildə təşkil edilən dünya çempionatının final mərhələsində iştirak edib və yekunda 5-ci yeri tutub. Bu mərhələdə 24 komanda iştirak edir ki, onlardan 23-ü seçmə mərhələlərdən vəsiqəni təmin edir, təşkilatçı ölkə isə birbaşa finalçılara qoşulur.