Azərbaycan yığması Avropa Oyunlarında ikinci oldu

Belarusun paytaxtı Minskdə keçirilən 2-ci Avropa Oyunlarında sərbəst güləş yarışına yekun vurulub.

Komanda.az xəbər verir ki, iki qızıl, bir gümüş və iki bürünc medal qazanan millimiz 110 xal toplayaraq, komanda hesabında ikinci yeri tutub. Rusiya 130 xalla birinci, Gürcüstan isə 78 xalla üçüncü olub.

Xatırladaq ki, yığmamızın heyətində Mahir Əmiraslanov (57 kq) və Hacı Əliyev (65 kq) Avropa Oyunlarının qalibi olub. Nurməhəmməd Hacıyev (97 kq) gümüş, Hacımurad Hacıyev (74 kq) ilə Camaləddin Məhəmmədov (125 kq) isə bürünc medalı boynundan asıb.